Settu upp jólaskreytingar innan um hákarla

Það er ekki aðeins í verslunargötum og á heimilum sem fólk keppist við að setja upp jólaskreytingar. Kafarar voru í morgun fengnir til að setja upp jólaskreytingar í stóru fiskabúri í sædýrasafninu í Madríd.

Þar máttu kafarar athafna sig innan um fiska í öllum regnbogans litum og aðra öllu stærri og hættulegri, nefnilega hákarla sem þar eru til sýnis. Hákarlarnir syntu framhjá köfurunum í rólegheitum meðan þeir komu fyrir myndum af jesúbarninu. Skjaldbaka ein gerði sig öllu ágengari og reyndi hún að hrifsa búnað af köfurunum, en án árangurs.