Flugslys í Grikklandi

Talið er að allir hafi farist þegar flugvél með hundrað og sextán manns innanborðs flaug á fjall um þrjátíu kílómetra norðan við Aþenu, höfuðborg Grikklands í morgun. Margt er enn á huldu um tildrög slyssins. Vélin, sem var af gerðinni Boeing 737 var farþegaflugvél frá kýpverska flugfélaginu Helios Airlines, á leið frá Larnaca á Kýpur til Prag, með millilendingu í Aþenu, með hundrað og tíu farþega og sex manna áhöfn. Flugmaðurinn hafði samband við flugturninn í Aþenu þegar vélin átti skammt eftir og var svo að skilja að hann hefði skyndilega orðið veikur eða að vandræði væru með loftkælinguna. Samband rofnaði síðan við vélina og voru þá tvær F-16 orrustuþotur sendar til að athuga hvað væri að og til að fylgja henni síðasta spölinn. Haft er eftir flugmönnum orrustuþotnanna að ekki hafi sést til flugmannsins í stjórnklefanum og aðstoðarflugstjórinn hafi verið eins og slytti í sínu sæti. Vélin flaug síðan beint á fjall á Grammatiko-svæðinu, sem er aðeins nokkra kílómetra frá alþjóða flugvellinum í Aþenu. Frændi eins farþegans fékk SMS-skilaboð skömmu áður en vélin lenti á fjallinu þar sem sagði að flugmaðurinn væri orðinn blár í framan og að það væri nístingskuldi í flugvélinni. Fjölmennt björgunarlið er komið á staðinn og af fréttamyndum má sjá að brak úr vélinni er dreift um stórt svæði og hlutar þess standa enn í ljósum logum. Ekki er talið að nokkur hafi komist lífs af. Ítalska blaðið Corriere della Sera hefur eftir flugvallaryfirvöldum í Larnaca að allir farþegarnir hafi verið Kýpverjar Þar segir einnig að áður en vélin lagði af stað hafi fundist bilun í búnaðinum sem stjórnar þrýstingi í vélinni en það átti að hafa verið lagað og flugvélin fékk því heimild til brottfarar. Lögregla segir engin merki þess að vélinni hafi verið rænt.