Páfi bað fyrir fæddum og ófæddum börnum

Sinn er siður í hverju landi og jólunum er fagnað með mismunandi hætti víðsvegar á hnettinum. Á Péturstorginu í Róm flutti Benedikt páfi sextándi sína fyrstu jólamessu á miðnætti. Hann bað fyrir friði í Ísrael og minntist sérstaklega á börn, fædd og ófædd, en hann er mikill og einlægur andstæðingur fóstureyðinga. Messa páfa var send út beint í fjörutíu og sex löndum og skarar fylgdust með á Péturstorginu. Síðar í dag flytur páfi svo jólaávarp sitt, urbi et orbi, frá svölunum á Péturskirkjunni.

Í fæðingarborg frelsarans, Bethlehem, sveif jólaandinn yfir vötnum hjá ferðamönnum og pílagrímum sem sóttu messu í fæðingarkirkjunni, sem stendur þar sem talið er að Jesús hafi fæðst. Jólahaldið fór fram með friði og spekt en nokkuð róstursamt hefur verið í borginni frá því að uppreisn Palestínumanna hófst árið 2000. Mahmoud Abbas, forseti Palestínu, kom til borgarinnar síðdegis í gær og tók þátt í hátíðarhöldunum.

Í Moskvu var jólum fagnað en það er tiltölulega fámennur hópur sem fagnar þeim nú þar sem jól eru eftir hálfan mánuð samkvæmt dagatali rússnesku rétttrúnaðarkirkjunnar. Nokkuð hundruð manns voru þó við stærstu kaþólsku kirkjuna í borginni í gærkvöldi og skutu þar upp flugeldum.

Á jarðskjálftasvæðunum í Kasmír er alla jafna ekki haldið upp á jól enda meginþorri íbúa þar múslímar. Í ár mun þetta þó vera öðruvísi. Fórnarlömb skjálftans taka því vel jólaandanum og taka þátt í gleðinni, auk þess sem hermenn og hjálparstarfsmenn hafa dreift jólagjöfum til barnanna sem urðu einna verst úti.

Í Bagdad fögnuðu kristnir jólum í kirkjum borgarinnar, sem eru um fimmtíu. Fólkið bað fyrir friði í landinu.

Í Guadalajara í Mexíkó voru það góðar óskir sem einkenndu hátíðarhöldin. Börnin í borginni skrifa jólaóskirnar á miða og setja inn í helíumblöðrum, sem síðan er sleppt. Þúsundir blaðra svifu til himins í gærkvöldi og settu sannarlega mark sitt á aðfangadagskvöldið í Mexíkó.

En hvergi er stemningin jafn afslöppuð og í Ástralíu, þar sem er hásumar. Þúsundir Sydney-búa flykktust nefnilega niður á Bondi-Beach í morgun til að njóta þar jóladagsblíðunnar. Hreint ekki galið.