Reyna að slökkva síðustu eldana

Breskir slökkviliðsmenn reyna nú að ráða niðurlögum þriggja síðustu eldanna sem enn loga í olíubirgðastöðinni í Buncefield og vonast til að það takist jafnvel í dag.

Þó heldur dragi úr eldsvoðanum í olíubirgðastöðinni í Buncefield, fjörutíu kílómetra norður af Lundúnum, er reykurinn frá eldunum enn það mikill að hluti hans liggur yfir Frakkland. Heilbrigðisyfirvöld staðhæfa þó að ekki eigi að stafa hætta af reykjarmekkinum þar sem engin eiturefni séu í honum.

Búið er að slökkva eld í sautján eldsneytistönkum hið minnsta og telja yfirvöld sig sjá fyrir endann á slökkvistarfi, svo kunni jafnvel að fara að síðustu eldarnir verði slökktir í dag.