Orðalagið ekki við hæfi

Ólafur Ragnar Grímsson, forseti Íslands, gagnrýnir Morgunblaðið fyrir umfjöllun blaðsins um veru forsetans við embættistöku furstans af Mónakó, í athugasemdum við skrif blaðsins sem birtist í Staksteinum í Morgunblaðinu í gær.

Fjallað var um veru forseta Íslands við embættistöku Alberts fursta af Mónakó í Staksteinum í Morgunblaðinu í gær. Þar var spurt hvers vegna forsetinn hefði verið við athöfnina. Forsetanum bærust eflaust mörg boð á athafnir víða um heim og væri full ástæða þiggja sum þeirra en önnur síðar. Pistlahöfundur, sem ekki er nafngreindur, sagði það geta komið óorði á slíkar heimsóknir ef þjóðhöfðingi ætti engin erindi á vegum þjóðarinnar við gestgjafa sína og óskaði eftir skýringum forseta á ástæðum farar sinnar.

Ólafur Ragnar Grímsson forseti svarar Morgunblaðinu í dag og segir margar ástæður hafa legið að baki för sinni. Ein sé áherslan á tengsl smáríkja, önnur sú að Albert fursti kom til Íslands á Smáþjóðaleika 1997 og sú þriðja að hann furstinn sé mikill áhugamaður um málefni norðurslóða. Forsetinn segir það því þjóna fjölþættum hagsmuna Íslendinga að vera við athöfnina og segir orðalagið í pistli Morgunblaðsins ekki við hæfi, einkum þegar í hlut eigi ríki og furstafjölskylda sem ávallt hafi sýnt Íslendingum vináttu.