Lélegur frágangur kostar milljónir

Lélegur frágangur á farmi vörubíla hefur kostað tryggingarfélögin meira en 110 milljónir króna undanfarin tvö ár. Lögregla hyggst grípa til aðgerða gegn þeim sem ekki ganga almennilega frá farmi á bílum sínum. Á síðasta ári nam kostnaður tryggingarfélaganna vegna lélegs frágangs rúmum 54 milljónum króna. Það er nokkru minna en árið 2003, þegar tryggingafélögin þurftu að greiða tæpar sextíu milljónir vegna slælegs frágangs á farmi. Á hverju ári verða mörg tjón vegna þess að laust jarðefni fýkur yfir bifreiðar sem mæta vörubílum. Auk þess eru dæmi um að alvarleg slys hafi orðið á fólki vegna þessa og jafnvel banaslys. Lögregluliðin á suðvesturhorni landsins munu frá og með 1. nóvember kæra ökumenn vörubifreiða sem ekki breiða yfir laust jarðefni sem flutt er með bifreiðunum. Aðgerðir lögreglunnar munu fyrst og fremst beinast að bílum sem ekið er á vegum þar sem leyfður hámarkshraði er 60 km/klst eða meiri.