Reyndi að fljúga á turn í Auckland

Flugmaður, sem stal lítilli flugvél í Auckland í Nýja-Sjálandi í dag, endaði ferðina í sjónum fyrir utan borgina eftir að hafa hótað að fljúga vélinni á Sky Tower, eitt helsta kennileiti borgarinnar. Maðurinn stal vélinni á flugvelli suður af borginni og þegar flugmálayfirvöld náðu sambandi við hann hótaði hann að fljúga á hinn 328 metra háa turn þar sem m.a. er að finna spilavíti og hótel. Því var gripið til þess ráðs að rýma turninn. Þyrla á vegum lögreglunnar veitti manninum eftirför sem flaug m.a. lágt yfir miðborg Auckland áður en vélin steyptist ofan í sjóinn fyrir utan borgina. Flugmaðurinn meiddist ekki mikið og tókst að komast af sjálfsdáðum í land. Talskona lögreglunnar í Auckland segir ástæðuna fyrir uppátæki mannsins vera þá að hann hafi orðið örvinlaður eftir fjölskyldudeilur.