Varaði við útbreiðslu kjarnavopna

Kofi Annan, framkvæmdastjóri Sameinuðu þjóðanna, varaði í dag við útbreiðslu kjarnavopna og hryðjuverka í ávarpi sínu á leiðtogafundi Sameinuðu þjóðanna í New York. Annan sagði að hættan á því að kjarnorkuvopn kæmust í hendur hryðjuverkamanna ykist með degi hverjum og því mætti ekki tefla á tæpasta vað með það að leita diplómatískra lausna. Eins og kunnugt er deila Evrópusambandið og Bandaríkin við Íran um kjarnorkuvopnaáætlun Írana, en þeir eru sakaðir um að nota áætlunina sem yfirvarp fyrir smíði kjarnavopna. Þá eiga yfirvöld í Norður-Kóreu í viðræðum við sex ríki um kjarnorkuáætlun sína. Condoleezza Rice, utanríkisráðherra Bandaríkjanna, hvatti Írana á fundinum í dag til þess að hverfa frá öllum hugmyndum um kjarnorkuvopnaframleiðslu, en Íranar halda því fram að kjarnorkuáætlun þeirra snúist eingöngu um orku en ekki vopn.