Öllum Íslendingum líklega óhætt

Skriða féll á íbúðahverfi í Björgvin í Noregi í nótt. Kona á sextugsaldri lést og fjögurra ára barn er slasað. Óttast er að súlur séu að hrynja í verslunarmiðstöð. Talið er að Íslendingar hafi ekki lent í skriðunni. Einn lést og níu slösuðust í aurskriðu og gríðarlegum rigningum í Björgvin og nágrenni í gærkvöldi og nótt. Guðrún Stefánsdóttir, arkitekt hjá Björgvinjarbæ, segir að varað hafi verið við rigningunum í gærkvöldi og þær hafi ekki farið fram hjá neinum Björgvinjarbúa en ekki hafi verið varað við hættu á aurskriðu. Aurskriðan hafi fallið á tvö raðhús. Óttast er að súlur í verslanamiðstöð séu að falli komnar. Aurskriðan hefur sett líf Björgvinjarbúa heldur betur úr skorðum í morgun. Guðrún segir að í útvarpinu hafi fólki verið ráðlagt að halda sig heima enda margar götur lokaðar. Flestir hafi þó mætt til vinnu sem og krakkar í skólana. Stefán Skjaldarson, sendiherra í Noregi, segir að ekki sé vitað til þess að aurskriðan hafi haft nein veruleg áhrif á Íslendingana á svæðinu.