Innri leið verður fyrir valinu

Allir borgarfulltrúar fögnuðu sérstaklega þeirri ákvörðun ríkisstjórnarinnar að leggja áherslu á samgöngubætur í höfuborginni við ráðstöfum söluandvirðis Landsíma Íslands. Sérstaklega var því fagnað að átta milljarðar króna skulu lagðir í fyrsta áfanga Sundabrautar á árunum 2007 til 2010. Tillögur um legu Sundabrautar bíða nú meðferðar umhverfisráðherra, vegna kæru íbúa. En af því gefnu að umhverfisráðherra telji innri leið færa yfir Kleppsvík verður ráðist í breytingu á gildandi Aðalskipulagi Reykjavíkur. Meirihlutinn í borgarstjórn hefur talað fyrir því að Sundabraut liggi yfir hábrú, í svokallaðri ytri leið, en frá því hefur nú verið fallið. Steinunn Valdís Óskarsdóttir borgarstjóri segir að í ræðu sinni í borgarstjórn þann 7. desember hafi hún sagt að hún væri opin fyrir öllum hugmyndum um Sundabraut. "Við komumst að þeirri niðurstöðu að það væri ekki forsvaranlegt að fara ytri leið, sem er 4.5 milljörðum dýrari og með ákveðnum forsendum erum við sátt við þetta svona." Forsendur sem meirihluti borgarstjórnar setur fyrir innri leið er að viðunandi lausn fáist á tengingu Sundabrautar við Sæbraut, og þar með við miðborgina. Þá sé mikilvægt að sjónarmiðum íbúa í Hamrahverfi og Vogahverfi sé mætt. Meðal annars sé verið að skoða að setja götu í stokk í Vogahverfinu og að Sundabraut liggi vestar í hamarinn en nú er gert ráð fyrir. Vilhjálmur Þ. Vilhjálmsson oddviti sjálfstæðismanna fagnaði ákvörðun ríkisstjórnarinnar í ræðu sinni í borgarstjórn í gær um verulega fjármuni til byggingu Sundabrautar og til mislægra gatnamóta Vesturlandsvegar og Suðurlandsvegar. Hann segir sjálfstæðismenn hafi flutt um það tillögu að innri leið Sundabrautar verði fyrir valinu og sé þessi niðurstaða í samræmi við það. Hann sagði þó að hann hefði viljað sjá fjármuni í mislæg gatnamót Miklubrautar og Kringlumýrarbrautar. "Sem hefði ugglaust verið í þessum ákvörðunum ríkisstjórnarinnar ef Rlistinn hefði ekki hafnað því á sínum tíma að byggja þar mislæg gatnamót."