Engin íslensk hrossamafía

Íslenska hrossamafían stundar ekki skipulagða glæpastarfsemi eins og þýsk tollayfirvöld héldu fram fyrir nokkrum árum. Eftir margra ára rannsókn hafa þau komist að því að mál sem vakti mikla athygli byggðist allt á misskilningi. Árið 1998 réðust þýsk tollayfirvöld til atlögu gegn hrossainnflytjendum í Þýskalandi. Aðalathyglin beindist að íslenska hestinum þar sem allir hestar frá Íslandi voru, samkvæmt tollapappírum, verðlagðir á nánast sama verði. Margir af þekktustu hestamönnum Íslands voru sakaðir um tollasvik og stefndu Þjóðverjarnir að því að fá fólkið a.m.k. dæmt til himinhárra fjársekta fyrir skipulagða glæpi. Þeir töldu víst að samsæri væri um að komast frá skattgreiðslum vegna hestanna. Málarekstrinum hefði lokið með fjöldagjaldþroti íslenskra hrossabænda fyrir utan þá hneisu sem málið hefði orðið - og varð raunar þar sem þýsk tollayfirvöld voru yfirlýsingaglöð í meira lagi. Hrossaútflutningur héðan stöðvaðist og er enn í minna lagi frá því fyrir upphlaupið. Í dag staðfestu Þjóðverjarnir að málinu væri lokið. Eftir miklar rannsóknir og íhlutun þýska fjármálaráðuneytisins rann upp fyrir tollayfirvöldum að hér væri ekki um skipulagða glæpastarfsemi að ræða. Íslensku hrossabændurnir reyndust ekki jafn bíræfnir og talið var heldur voru þeir í raun frekar rænulausir og fylgdu gömlum sið sem rekja má til vinsællar þýskrar barnamyndar. Ferien auf dem Immenhof heitir myndin frá 1959 og þar sáu Þjóðverjar íslenska hestinn í fyrsta sinn. Þegar flytja átti þá héðan til að nota í myndinni vissi enginn hvernig fylla átti út tollskýrslur eða verðsetja hrossin. Því var fundin upp reikniaðferð til að komast að lágmarksverði, sem æ síðan hefur verið fært samviskusamlega til bókar á tollaskýrslum. Það kemur væntanlega ekki á óvart að hross árið 1959 og verðlaunahestar fjórum áratugum síðar eru ekki sambærilegur varningur fyrir tollara. Lágmarksverð á ekki við stóðhesta. Fyrir vikið kom upp undarleg aðstaða hjá þýska tollinum og þess vegna taldi tollurinn hrossamafíu að verki. Þeir komust hins vegar að lokum að því að ekki væri um viljaverk að ræða og Íslendingarnir verða því aðeins að greiða skattaviðbót fyrir þrjú undanfarin ár, en engar sektir eða sæta annarri refsingu. Upphæðin nemur, samkvæmt heimildum fréttastofunnar, á milli sex og sjö milljónum króna sem deilast niður á um sextíu mál. Þýsk yfirvöld munu fús að ræða þægilegt greiðslufyrirkomulag. Að auki á að setja saman reglugerð um hvernig beri að tollskrá flutning dýra á milli landa svo að misskilningur af þessu tagi komi ekki upp á ný. Þegar málið kom upp á sínum tíma stóð heimsmeistaramót sem hæst í Þýskalandi og finnst hestamönnum viðeigandi að málinu ljúki meðan á mótinu stendur í Svíþjóð.