Fleiri skriður gætu fallið

Vegurinn um Fagradal er lokaður vegna aurskriðna en vonast er til að hægt verði að opna hann seint í kvöld. Að minnsta kosti sjö bílar voru fastir í dag á milli skriðna og er óttast að fleiri skriður geti fallið. Tæplega hundrað manns flúðu tjaldstæðið á Höfn í Hornafirði vegna vonskuveðurs og leituðu skjóls í íþróttahúsinu. Rigningar og vonskuveður hefur verið eystra í dag. Við Mýrarbotna á Fagradal lét jörð undan og flæddu aurskriður yfir veginn a.m.k. á tveimur stöðum þannig að í það minnsta sjö bílar voru fastir á milli skriðanna um nokkurra klukkustunda skeið. Búið er að opna leið fyrir bílana út. Þá hefur sjónvarps-, síma- og netsamband truflast eða lagst af á Austurlandi vegna bilunar og vegna aurskriðanna en sökum veðurs hefur viðgerð tafist. Menn búast allt eins við fleiri skriðum. Samkvæmt upplýsingum frá Vegagerðinni er vonast til að hægt verði að opna veginn um Fagradal um eða upp úr klukkan níu í kvöld. Vegagerðarmenn þurftu að rjúfa veginn og setja ræsi í hann. Hjá Vegagerðinni segja menn þó að ökumenn verði að sýna sérstaka aðgát á leið um Fagradal eftir að vegurinn verður opnaður því ekki er öruggt að fleiri skriður falli ekki. Þá setti veðurhamurinn strik í reikninginn hjá ferðamönnum á Humarhátíðinni á Höfn í Hornafirði. Lögregla, björgunarsveitir og Rauði krossinn aðstoðuðu fólkið við að taka niður tjöld og koma því í skjól í íþróttahúsinu og um hádegið voru þar tæplega hundrað manns en allir eru komnir til síns heima núna. Þá er enn unnið að rannsókn nauðgunarmáls sem upp kom í fyrrinótt á Höfn. Einn maður var handtekinn vegna málsins en honum var sleppt eftir skýrslutöku. Í Ólafsvík gekk nóttin vel fyrir sig miðað við nóttina á undan, enda hafði gestum Færeyskra daga snarfækkað eftir vonskuveður á svæðinu. Þar er enn unnið að rannsókn nauðgunarmáls sem upp kom en grunur leikur á að 15 ára stúlku hafi verið byrlað ólyfjan og henni nauðgað.