Helmingur starfseminnar úr landi?

Svo getur farið að danska flugfélagið Sterling, sem er í eigu Íslendinga, flytji um helming starfsemi sinnar frá Danmörku. Þá er ljóst að dregið verður úr sætaframboði á leiðum sem Sterling og Maersk, sem er í eigu sömu aðila, fljúga bæði á.   Flugvallayfirvöld í Danmörku hafa slitið viðræðum við dönsk flugfélög um lendingar- og þjónustugjöld og hefur málinu verið vísað til samgönguráðherra landsins. Ákvörðunin kom forvígismönnum flugfélaganna í opna skjöldu. Stefan Vilner, yfirmaður hjá Sterling, segir að í viðræðunum og með þessari ákvörðun sýni flugvallayfirvöld sitt rétta andlit. Þeim sé í raun sama um hvernig flugumferðin gangi, það eina sem skipti máli sé að þéna eins mikið á henni og mögulegt er og var liðlega átta milljarða króna hagnaður af rekstri flugvalla á síðasta ári. Meðal þess sem nú er deilt um er hvort að flugvellir á Kaupmannahafnarsvæðinu megi hækka öryggisgjald á hvern farþega og afnema afslátt af flugvallasköttum á farþega sem millilenda. Minnt er á að danska ríkið eigi 34% hlut í flugvöllum svæðisins og 14% í SAS og sé því að einhverju leyti sama um önnur flugfélög. Talsmaður Sterling hefur því efasemdir um að öll flugfélög sitji því við sama borð. Gangi þessar hækkanir eftir munu þær, ásamt samruna við Maersk, hafa margvíslegar afleiðingar fyrir Sterling að mati talsmanns fyrirtækisins, að því er fram kemur í Politiken í dag. Hann segir að vegna samrunans verði sætaframboð minnkað um 10-15% á þeim leiðum sem bæði félögin fljúga á og ef skattahækkanirnar gangi eftir muni félagið flytja 40-50% af starfseminni úr landi. Starfsemin verður þá flutt annað á Norðurlöndunum, til dæmis til Sturup-flugvallarins við Málmey, en Sterling er með flug þaðan til Alicante á Spáni og segir talsmaðurinn mikla vaxtarmöguleika í Svíþjóð.