Dró sér fé á vernduðu heimili

Starfsmaður í félagslegri heimaþjónustu er talinn hafa dregið sér fé frá fjórum íbúum á vernduðu heimili í að minnsta kosti eitt ár. Starfsmaðurinn, sem hafði unnið lengi hjá borginni, var umsvifalaust leystur frá störfum þegar fjárdrátturinn kom í ljós. Starf mannsins var umsýsla og aðstoð við geðfatlaða sem lokið hafa meðferð og verið er að hjálpa að fóta sig í samfélaginu. Hann keypti meðal annars mat fyrir fé sem íbúarnir fjórir greiddu í sjóð í hverjum mánuði. Samkvæmt reglum borgarinnar eiga starfsmenn hennar ekki að fara með fjármuni íbúa á vernduðum heimilum. Ekki liggur fyrir hvort mennirnir munu fá peninga sína til baka. Reykjavíkurborg og Landsspítalinn koma sameiginlega að þessum vernduðu íbúðum, en starfsmaðurinn tengdist Landspítalanum ekki. Málið er nú í rannsókn hjá velferðarsviði og innri endurskoðun borgarinnar og þegar henni lýkur verður ákveðið hvort málið verður sent til lögregluyfirvalda.