Rætt um staðsetningu álvers

Fulltrúar frá Akureyrarbæ, Húsavíkurbæ og Sveitarfélaginu Skagafirði áttu í vikunni fund í Reykjavík með starfsmönnum Fjárfestingastofu og Alcoa varðandi staðsetningu nýs álvers á Norðurlandi. Kristján Þór Júlíusson, bæjarstjóri Akureyrar, segir að þetta hafi verið fyrsti viðræðufundurinn af fleirum sem haldnir verða en á fundinum hafi ekki verið tekin ákvörðun um staðsetningu. „Það er mikilvægt að aðilar nái saman um að skoða þetta sem sameiginlegt verkefni og sláist ekki innbyrðis enda engin ástæða til," segir Kristján.