Ekki hægt að tryggja sig

Ekki er hægt að tryggja sig gegn tjóni vegna veggjatítlna hjá tryggingafélögunum og stendur ekki til að bæta þar úr. Þeir eigendur timburhúsa sem fá þessa óboðnu gesti geta þannig staðið uppi með verðlausa húseign. Eins og fram kom í fréttum Stöðvar 2 í gær eru veggjatítlur vaxandi vandamál í eldri húsum borgarinnar en þær bókstaflega éta upp timburhús komist þær í þau. Kaupendur fjölmargra húsa í miðbæ Reykjavíkur hafa leitað réttar síns vegna mála sem þessara en þar sem í raun engum er að kenna, ber enginn ábyrgð. Bragi Björnsson lögmaður segir að þar sem um minniháttar galla sé að ræða, þ.e. að auðvelt sé að gera við það sem úrskeiðis hefur farið og koma í veg fyrir frekari skaða af völdum veggjatítlnanna, skrifist það á kaupanda. Ef um meiriháttar tjón er að ræða er hins vegar í flestum tilvikum hægt að sækja á seljanda fasteignar um bætur í formi afsláttar. Bragi segir að minnsta kosti þrjá dóma hafa fallið í málum sem þessum hér á landi sem hafa fallið á báða vegu. Hvert mál sé í raun einstakt. Ástand hús og aldur þeirra skipti t.a.m. máli og því sé erfitt að gefa algilda reglu. Eigendur timburhúsa geta ekki tryggt sig gegn tjóni sem þessu, ekki frekar en þegar um náttúruhamfarir er að ræða. Hjálmar Sigurþórsson, framkvæmdastjóri tjónaþjónustu TM, segir undir þessum kringumstæðum helst koma til greina fasteignatrygging en þar sem það sé eðli vátrygginga að tryggja hið skyndilega nær sú trygging ekki yfir atvik af þessu tagi í dag. Og ekki stendur til að breyting verði þar á þó málið verði vissulega skoðað að sögn Hjálmars.