Verst settir fá enga hjálp

Skilyrði geta komið í veg fyrir að ávinningur af skuldaniðurfellingu margra af fátækustu ríkja heims komist til þeirra sem mest þurfa á að halda. "Skilyrði um stjórnhætti, baráttu gegn spillingu og þróun í lýðræðisátt útiloka mörg fátækustu landanna," sagði Jónas Þórir Þórisson, framkvæmdastjóri Hjálparstarfs kirkjunnar í Hádegisútvarpi Talstöðvarinnar í gær. "Mörg af fátækustu löndunum geta ekki náð þessum skilyrðum án utanaðkomandi aðstoðar," sagði Jónas Þórir. "Aðstoðin nær því ekki til þeirra sem verst eru settir en þær þjóðir sem þegar eru komnar á skrið fá aðstoð." Jónas segir jákvætt að þær þjóðir fái aðstoð en ekki megi gleyma hinum sem ekki eiga hennar kost. Jónas segir mörg vandamál koma upp þegar ráðstafa vinna eigi fjármunum sem vinnast við skuldaniðurfellinguna og þar bíði ærið verkefni frjálsra félagasamtaka. "Frjáls félagasamtök geta tekið höndum saman og aðstoðað stjórnvöld við að byggja upp stjórnkerfið," segir Jónas Þórir. "Þau geta jafnframt verið nokkurs konar varðhundar á að allt fari vel fram og verði ekki spillingu og misnotkun að bráð."