Hittast í dag og ræða álver

Fulltrúar sveitarfélaga á Norðurlandi og iðnaðarráðuneytisins hittast í dag að máli til þess að ræða möguleika á álveri á Norðurlandi. Tilgangur fundarins er að reyna að ná samstöðu Norðlendinga um undirbúning álversins. Slíku samstarfi var komið á meðal sveitarfélaga á Austurlandi í aðdraganda álversbyggingar í Reyðarfirði og reyndist vel að sögn Andrésar Svanbjörnssonar, yfirverkfræðings í iðnaðarráðuneytinu. Ekki er komið í ljós hvar á Norðurlandi álver risi en þrír staðir koma þar enn helst til greina: Skagafjörður, Eyjafjörður og Húsavík. Forsvarsmenn sveitarfélaga sem rætt var við í gær sögðu viðræður sveitarfélaga og ráðuneytis hafnar en tillögur skildu enn allt eftir opið varðandi hvaða staður yrði endanlega fyrir valinu.