Endurskoðunar þörf

Stofnunin hlýtur að endurskoða stöðu sína í ljósi breyttra aðstæðna," segir Aðalsteinn Þorsteinsson, forstjóri Byggðastofnunar. Valgerður Sverrisdóttir, iðnaðar- og viðskiptaráðherra, ræddi um vanda stofnunarinnar á ársfundi hennar fyrir helgina og sagði núverandi lánastefnu fremur þjóna stöðnuðu atvinnulífi en framsæknum iðnaði. Valgerður segir fátt benda til þess að fjármögnunarstarfsemi stofnunarinnar geti orðið fjárhagslega sjálfbær. Aðalsteinn vill ekki meina að svo sé þrátt fyrir að rekstur í óbreyttri mynd geti ekki staðið undir sér. "Ég er ekki sannfærður um að aðgengi landsbyggðarinnar að fjármagni sé orðið gott og þá er ennþá þörf fyrir stofnunina," segir Aðalsteinn en bætir við að hlutverk stofnunarinnar sé ekki að keppa við viðskiptabankana. "Ef þeir geta sinnt þessu nægilega vel er ekki lengur þörf fyrir okkur." Fjögurra manna nefnd hefur verið skipuð til þess að fara yfir stöðu stofnunarinnar og aðgerðir sem grípa megi til. "Við eigum ekki von á byltingu en breyttar aðstæður kalla á endurmat stofnunarinnar," segir Aðalsteinn. "Þetta er kærkomið tækifæri til þess að endurskoða og marka stefnuna upp á nýtt."