Eiturefnaleki í Lagarfossi

Flutningaskip Eimskipa, Lagarfoss, fékk að halda för sinni til Íslands áfram eftir komist var fyrir leka í ammóníaksgámi sem upp kom í skipinu aðfaranótt laugardags. Skipið var statt undan ströndum Skotlands þegar lekinn kom upp og var strandgæslan í Aberdeen þegar látin vita. Skipstjórinn stöðvaði ferð skipsins meðan áhöfnin fylgdist með lekanum. Hann hætti sjálfkrafa nokkrum klukkustundum síðar að sögn Eyþórs Ólafssonar, öryggisstjóra Eimskipa. Ekki fékkst staðfest hvort eiturefnasérfræðingar á vegum skosku strandgæslunnar komu út í skipið til þess að fylgjast með lekanum, þar sem ekki náðist í Lagarfoss í gær. Talið er að loki hafi opnast á gámi með þeim afleiðingum að ammóníak flæddi út í andrúmsloftið. Grunsemdir vöknuðu um lekann hjá áhöfn skipsins eftir að ammóníaklykt barst út í andrúmsloftið. Að sögn Eyþórs voru öryggisráðstafanir gerðar í kjölfarið en um borð eru efnagallar og öndunarbúnaður fyrir áhöfn. Ekki kom til tals að rýma skipið. Lagarfoss er væntanlegur til landsins snemma dags í dag en ákveðið var að beina skipinu að Grundartangahöfn þar sem búist er við að vindátt verði hagstæð. Slökkvilið höfuðborgarsvæðisins tekur á móti skipinu og sjá tíu eiturefnakafarar til þess að alls öryggis verði gætt við losun gámsins. Ekki er vitað með vissu hversu mikið ammóníak lak en Eyþór telur líklegt að það hafi numið nokkrum tugum kílóa. Ammóníak er eiturefni og getur verið hættulegt ef mikið magn þess losnar út í andrúmsloftið en Eyþór segir enga hættu hafa verið á ferðum af völdum lekans í Lagarfossi. Mun meira magn þurfi að losna til þess að hafa áhrif á umhverfið. Ammóníak er kæliefni og mikið notað hérlendis, meðal annars í frystihúsum.