Æfir vegna seinkunar á flugi

Erlendir ferðamenn, sem eru strandaglópar á Keflavíkurflugvelli, eru æfir yfir meira en sólarhringsseinkun á flugi Icelandair til San Francisco. Bilun í hreyfli veldur seinkuninni en ekki reyndist unnt að útvega aðra vél til að fljúga með mannskapinn. Samkvæmt áætlun átti flugvél Icelandair að fljúga til San Francisco síðdegis í gær. Bilun kom hins vegar upp í ventli sem stýrir flæði inn í hreyfil sem olli því að ekki var hægt að fljúga vélinni. Reynt var að gera við hreyfilinn en senda þurfti eftir varahlut sem kom svo í tvennu lagi til landsins. Gert er ráð fyrir því að vélin fari til San Francisco klukkan hálftvö í nótt. Erlendir ferðamenn eru ósáttir við seinkunina og kvarta yfir upplýsingaskorti. Eric Smiley, einn þeirra sem áttu bókað far með vélinni, segist hafa beðið og beðið. Eftir tveggja tíma seinkun hafi farþegarnir fengið að vita að fjögurra tíma seinkun yrði á fluginu og svo átta og tíu tíma. Síðan hafi hann farið upp á hótel um miðja nótt í nokkra tíma en svo komið aftur og þá hafi liðið átta tímar án þess að farið yrði af stað. Þetta hafi verið mjög óþægilegt og skrítið. Stacy Smith, sem einnig var á leið til San Francisco, segir að það hafi komið verst við farþegana að þeir hafi ekki fengið neinar upplýsingar. Í gærkvöldi hafi hópnum ekki verið tilkynnt að ekki yrði farið þá heldur hafi hann komist að því þar sem upplýsingar á brottfararskjá hafi breyst. Fólk hafi litið á skjáiinn og tíminn hafi breyst frá 02.00 í 13.30. Ekki hafi verið vel að málum staðið. Aðspurður hvers vegna ekki hafi verið fengin önnur vél til að flytja fólkið vestur um haf segir Guðjón Arngrímsson, upplýsingafulltrúi Icelandair, að menn hafi ætlað sér að gera við bilunina á skemmri tíma en raunin varð. Þegar komið hafi í ljós að töfin yrði veruleg þá hafi verið reynt að finna flugvélar en þær hafi ekki verið á lausu, en talað hafi verið nánast annað hvert flugfélag í heiminum. Guðjón segir ekki auðvelt að létta fólki lífið í tilvikum sem þessum því fólk verði pirrað. Fólki hafi venju samkvæmt verið gefið að borða og farið með það í Bláa lónið og upp á hótel í nótt, en tafir sem þessar séu vissulega pirrandi.