Barneignir hafi góð áhrif á MS

Það hefur góð áhrif á konur með MS-sjúkdóminn að eignast börn, samkvæmt nýlegum rannsóknum, en lengi var það talið slæmt. Fulltrúar norrænna MS-félaga hafa síðustu daga fundað í húsnæði MS-félagsins á Íslandi og hefur megináherslan verið lögð á að ræða um unga fólkið og MS-sjúkdóminn, eða multiple sclerosis, sem er taugahrörnunarsjúkdómur. Þrír af hverjum fjórum sem greinast með sjúkdóminn eru konur um tvítugt eða á þrítugsaldri. Á fundinum hefur meðal annars verið rætt um það hvaða áhrif það hefur á ungt fólk að greinast og hvernig því gengur að aðlagast breyttum aðstæðum og lifa lífinu. Lengi hefur verið talið að konur með MS gætu farið illa út úr því að eignast börn þar sem því fylgdi svo mikið álag á líkamann að sjúkdómurinn gæti versnað. Nýlegar rannsóknir, meðal annars í Svíþjóð, benda hins vegar til þess að þessu kunni að vera þveröfugt farið og að það geri konum með sjúkdóminn gott að verða óléttar. Hormón sem myndast í líkama við þungun virðast hafa þau áhrif að líkurnar á því að sjúkdómurinn versni minnka. Steinunn Þóra Árnadóttir er 28 ára og greindist með MS-sjúkdóminn fyrir sjö árum. Hún eignaðist barn fyrir sjö vikum. Hún segir meðgönguna hafa verið draumi líkasta því einkenni sjúkdómsins hafi minnkað til muna, en það gæri þó verið tilviljun. Steinunn segir að tölfræðin segi að meðgangan sé yfirleitt mjög góður tími fyrir konur með MS-sjúkdóminn. Tölfræðin segi einnig að það verði stundum breyting upp úr fimmtugu hjá fólki með sjúkdóminn. Þá hætti einkennin að koma í köstum sem gangi til baka en fólki versni hægt án bataskeiða. Það virðist hins vegar sem meðgangan hafi einhver verndandi áhrif þannig að skeiðið með köstunum sem gangi til baka lengist. Vonandi hafi litla dóttir hennar þau áhrif að hún verið jafnvel hressari eftir fimmtugt en hún myndi ella verða.