HR útskrifar 259 nemendur

Háskólinn í Reykjavík útskrifaði í dag 259 manns við hátíðlega athöfn í Borgarleikhúsinu. Í fyrsta sinn úrskrifaði skólinn nemendur með BA-gráðu í lögfræði en alls voru 42 útskrifaðir frá lagadeild, 73 af tölvunarfræðideild og 144 frá viðskiptadeild háskólans. Í ræðu sinni við útskriftina fjallaði Guðfinna S. Bjarnadóttir, rektor skólans, um mikilvægi þess að vísindi gæfu til samfélagsins og að frumkvöðlar væru listamenn vísinda og drifkraftur atvinnulífs. „Háskólinn í Reykjavík vill byggja orkuver þekkingar þar sem maðurinn sjálfur og hugarorka hans er meginauðlindin. Þar sem hugurinn og handaflið, mannvitið og metnaðurinn, uppfinningar og útrás fara saman. Við eigum að líta á þekkinguna sem bæði hráefni og úrvinnsluefni, óþrjótandi auðlind sem vex eftir því sem hún er meira notuð,“ sagði Guðfinna. Þetta er í síðasta sinn sem útskrifað er frá Háskólanum í Reykjavík einum því í sumar sameinast hann Tækniháskóla Íslands undir nafni þess fyrrnefnda.