Hátt í 20 þúsund í Kvennahlaupi

Kvennahlaup ÍSÍ fer fram víða um land í dag. Þetta er í sextánda sinn sem hlaupið fer fram en alls verður hlaupið á 90 stöðum á landinu. Talið er að hátt í 20 þúsund konur á öllum aldri muni taka þátt í hlaupinu en flestir þátttakendur voru í Garðabæ, eða fimm þúsund, en þar hófst hlaupið klukkan tvö. Þá hafa íslenskar konur á erlendri grund ekki látið sitt eftir liggja því hlaup hafa verið skipulögð á 14 stöðum í níu löndum, allt frá Kaupmannahöfn til Addis Ababa í Eþíópíu. Yfirskrift hlaupsins í ár er Áfram stelpur! og er tilgangurinn er að vekja athygli á hversu mikilvægt er fyrir konur, og þá ekki síst ungar stúlkur, að eiga sér heilbrigðar og sterkar fyrirmyndir.