Helmingur krefst afsagnar stjórnar

Átta kennarar af fimmtán í Landakotsskóla krefjast þess að stjórn skólans segi af sér þar sem hún vilji ekki veita skólastjóra skólans það vald sem honum beri að hafa samkvæmt grunnskólalögum. Fjölmennur fundur foreldra, kennara og stjórnar Landakotsskóla var haldinn í gærkvöldi og sendu kennarar frá sér yfirlýsingu að honum loknum þar sem þess var krafist að stjórnin segði af sér. Á fundinum var lýst yfir áhyggjum af ástandinu í skólanum og rætt um hvað gera þyrfti til að leysa deiluna við hann sem virðist í algjörum hnút. Að sögn kennara sem fréttastofa Bylgjunnar ræddi við í morgun vörpuðu foreldrar fram mörgum spurningum til stjórnarinnar um skólastarfið og atvik síðustu vikna en að fátt hefði verið um greinargóð svör.