Ólöglegar aðferðir

"Mín skoðun er sú að stjórn Landakotsskóla sé ekki heimilt að beita þvingun til að fá starfandi kennara við skólann til að lýsa yfir stuðningi við stjórnina. Kennararnir líta á þetta sem ákveðna hótun. Níu kennarar, sem kenna við Landakotsskóla, sem beðnir hafa verið um skrifa undir slíka stuðningsyfirlýsingu hafa leitað til okkar. Það er klárt að þessum kennurum ber ekki að lýsa yfir stuðningi við stjórnina," segir Margrét Einarsdóttir lögmaður sem hópur kennara við Landakotsskóla hefur leitað til vegna bréfs sem stjórn Landakotsskóla sendi þeim á miðvikudag. Í bréfinu var sagt að þeir kennarar sem vilji starfa áfram við skólann þurfi að lýsa yfir stuðningi við nýkjörna stjórn Landakotsskóla til að halda starfi sínu. Kennararnir leituðu lögfræðiálits á fimmtudagsmorgun en ekki er komið á hreint til hvaða ráða kennararnir hyggjast grípa í framhaldinu.