Ítalskur gísl látinn laus

Clementina Cantoni, ítalski hjálparstarfsmaðurinn sem var rænt í afgönsku höfuðborginni Kabúl fyrir þremur vikum, var í gær látin laus, heil á húfi. Vopnaðir menn rændu Cantoni á götu í Kabúl 16. maí síðastliðinn, en hún er 32 ára starfsmaður alþjóðlegu Care-hjálparsamtakanna og hafði sem slík starfað í Afganistan frá því í september 2003, einkum við að hjálpa ekkjum og börnum þeirra. "Hún er heil á húfi," sagði talsmaður afganska innanríkisráðherrans í gærkvöld. "Hún er í innanríkisráðuneytinu. Hún er búin að tala við móður sína," tjáði talsmaðurinn, Latfullah Mashal, AP-fréttastofunni. Hann sagði ennfremur að ekki hefði verið greitt lausnargjald fyrir Cantoni. Hann sagði samverkandi þrýsting afgansks almennings, Hamid Karzai forseta, ættflokkahöfðingja og múslimaklerka hafa dugað til að telja mannræningjana á að sleppa Cantoni. Fréttinni af lausn Cantoni var fagnað mjög í heimalandi hennar. Ítalski utanríkisráðherrann Gianfranco Fini lýsti "gríðarlegum létti" yfir fréttinni. Ránið á Cantoni vakti áhyggjur um að uppreisnarmenn í Afganistan væru í auknum mæli að taka upp baráttuaðferðir uppreisnarmanna í Írak.