Tíu þúsund vegabréf í júní

Mikið álag hefur verið hjá Útlendingastofnun undanfarið vegna vegabréfaútgáfu. Þann 9. júní síðastliðinn höfðu 3000 vegabréf verið gefin út, og ef fram heldur sem horfir verða yfir tíu þúsund vegabréf gefin út í mánuðinum, sem er einsdæmi. Í júní í fyrra voru gefin út rúmlega sex þúsund, sem þótti mjög mikið þá. Flestir umsækjendanna eru á leið til Bandaríkjanna. "Afgreiðslan er stútfull alla daga af fólki sem er pirrað yfir því að þurfa að bíða," sagði Elín Inga Arnórsdóttir, verkstjóri vegabréfadeildar. "Það hefur verið aukning hjá okkur alla mánuði ársins 2005. Húsnæðið og tölvukerfið hjá okkur býður ekki upp á meiri afköst." Krónan hefur verið mjög há gagnvart Bandaríkjadal undanfarið og því ódýrt að ferðast þangað og hagkvæmt að versla þar. Einnig mun bandaríska vegabréfaeftirlitið frá og með 26. júní gera kröfu um að öll vegabréf hafi tölvulesanlega rönd. Nú eru því síðustu forvöð að útvega ný vegabréf fyrir þann tíma. Almennur afgreiðslutími vegabréfaumsókna er tíu virkir dagar. Hjá Flugleiðum fengust þær upplýsingar að ferðalög Íslendinga til Bandaríkjanna hefðu aukist um 50 prósent síðan í fyrra. "Ég vil brýna alla sem ætla til Bandaríkjanna að útvega sér gild vegabréf með góðum fyrirvara," sagði Guðjón Arngrímsson, upplýsingafulltrúi Flugleiða. Fylgjast á vel með því að farþegar komist ekki um borð með úrelt vegabréf en flugfélög verða sektuð um rúmar 200.000 krónur fyrir hvern slíkan farþega. Tolla- og landamæraeftirlit Bandaríkjanna hefur gefið það út að farþegar með vegabréf án tölvurandar geti ekki vænst þess að fá neinar undanþágur eftir 26. júní. Öll vegabréf gefin út á Íslandi eftir 1. júní 1999 hafa tölvurönd og duga því til að komast inn í Bandaríkin. Ennfremur hefur verið vandkvæðum bundið að komast til Bandaríkjanna á eldri vegabréfum og eru dæmi þess að Íslendingar með gömul vegabréf hafi verið teknir í yfirheyrslur, jafnvel í margar klukkustundir. Bandaríkin eru fyrsta ríkið í heiminum sem gerir kröfu um tölvurönd á vegabréfum, en búast má við því að fleiri lönd fylgi í kjölfarið áður en langt um líður.