Danska lögreglan í vafa

Danska lögreglan er ekki sannfærð um að samtök, sem segjast hafa kveikt í bíl ráðherra innflytjendamála í Danmörku í gær, standi að baki verknaðinum. Enginn hefur enn verið handtekinn eftir að kveikt var í bíl Rikke Hvilshöj en rannsókn lögreglunnar beinist nú að ákveðnum manni sem ásamt þremur öðrum var dæmdur í fangelsi fyrir svipaða árás á forstjóra útlendingaeftirlitsins í Danmörku. Samtök sem sögðust berjast gegn stefnu stjórnvalda í innflytjendamálum lýstu ábyrgð á árásinni á Hvilshöj á hendur sér en lögreglan hefur miklar efasemdir um það. Rannsóknin hefur þó einnig beinst að ýmsum öfgasamtökum, bæði á hægri og vinstri væng.