Vonbrigði með lítinn árangur

Guðný Hrund Karlsdóttir, sveitarstjóri í Raufarhafnarhreppi, segist hafa orðið fyrir vonbrigðum með lítinn stuðning stjórnvalda, en þau gáfu vilyrði fyrir aðstoð þegar staðurinn gekk í gegnum mikla erfiðleika. "Ég hélt að það væri meira kjöt á þessum beinum ríkisstjórnarinnar, því það hefur ekki farið mikið fyrir þeim stuðningi sem talað var um." Staða Raufarhafnar hefur batnað mikið, en að sögn Guðnýjar ber að þakka það aðgerðum sem sveitarstjórnin hefur gripið til. Væntingar sem gerðar voru til nefndar sem skipuð var af Valgerði Sverrisdóttur, iðnaðar- og viðskiptaráðherra, voru miklar og því vonbrigði að henni hafi ekki tekist að koma málum í framkvæmd. "Nefndin hefur vafalaust lagt sig alla fram en einhverra hluta vegna höfum við ekki orðið vör við mikinn árangur af störfum hennar," segir Guðný. Valgerður Sverrisdóttir, sem er einnig ráðherra byggðamála, segir málið flóknara en svo að nefndastarf skili endanlegum lausnum á svona málum. "Það er ekki svo að ríkisstjórn Íslands geti dregið lausnir í svona málum upp úr hatti. Nefndin sem skipuð var kom hins vegar ýmsum málum á hreyfingu, og beitti sér fyrir því að koma upp atvinnustarfsemi á svæðinu, sem síðar varð raunin".