Óvissa um staðarval loðnubræðslu

Ólafur Örn Ólafsson, bæjarstjórinn í Grindavík, bindur vonir við að Síldarvinnslan ákveði að byggja upp starfsemi sína í bænum. "Við erum að vonast til þess að aðstaðan sem hér er fyrir hendi, muni vega þyngst þegar ákvörðun um staðsetningu verksmiðjunnar verður tekin. Sérstaklega eru það fjárfrekar framkvæmdir við höfnina, sem við vonum að muni ráða úrslitum". Björgúlfur Jóhannsson, framkvæmdastjóri Síldarvinnslunnar, segir ákvörðunar að vænta bráðlega. "Það er þrennt sem kemur til greina varðandi uppbyggingu okkar á Reykjanesi. Það er að byggja upp í Grindavík, Helguvík eða á báðum stöðum". Húsnæði Síldarvinnslunar í Grindavík brann í vetur, en þá var það í eigu Samherja. Nýverið seldi Samherji svo Síldarvinnslunni bræðsluna, en ákvörðunar stjórnar um staðarval vinnslunar er að vænta innan tíðar.