Ökumönnum umbunað út frá ökuritum

Vátryggingafélag Íslands ætlar að bjóða ungum ökumönnum að hafa ökurita í bílum sínum í sumar. Besti ökumaðurinn verður svo valinn í sumarlok út frá þeim upplýsingum sem ökuritinn hefur skráð um aksturslagið. Þátttakendur í leiknum eiga að vera á aldrinum sautján til nítján ára og eiga eigin bíl sem þeir aka reglulega. En menn gera þetta nú líklega ekki bara sér til skemmtunar, að setja ökurita í bílinn sem skráir akstursleið, ökuhraða og aksturslag. Hann nemur til dæmis þegar keyrt er of hratt, ef það er gefið snöggt í, bremsað harkalega eða farið hratt eða glannalega í beygjur. Gulrótin er sú að ökumennirnir fá verulegan afslátt af ábyrgðartryggingu bílanna í eitt ár og sá sem ber sigur úr býtum vinnur ferð fyrir tvo í ökuskóla BMW í Þýskalandi. Aðeins tuttugu ökumenn geta tekið þátt - og það skal tekið fram að orðið ökumenn nær yfir bæði kyn - en áhugasamir ökumenn sem uppfylla skilyrðin hafa tíma til 20. júní til að skrá sig.