Saurmengun langt yfir mörkum

Saurmengun í Arnarneslæk í Garðabæ er langt yfir þeim mörkum sem teljast fullnægjandi, samkvæmt nýlegri mælingu Heilbrigðiseftirlitsins. Ástandið er talið ófullnægjandi ef fjöldi saurkóligerla og saurkokka fer yfir 1000 í hverjum 100 millilítrum. Á vef Víkurfrétta kemur hins vegar fram að í Arnarneslæknum fyrir neðan Ljósumýri séu 17 þúsund saurkóligerlar í 100 millilítrum og 73 þúsund saurkokkar. Talið er að annað hvort sé klóakið vitlaust tengt í einhverju húsi eða þá að stífla hafi myndast í holræsakerfinu svo að klóakið fari í lækinn um yfirfallið þar sem yfirleitt á aðeins að fara regnvatn.