Segir aðgerðir munu skila árangri

Stjórn Landakotsskóla telur að þær aðgerðir sem gripið hafi verið til til lausnar fjárhags- og stjórnunarvanda skólans eigi eftir að skila árangri og tryggja grundvöll starfseminnar til framtíðar. Þetta kemur fram í yfirlýsingu sem stjórn skólans sendi frá sér í dag, en undir hana skrifar Gunnar Örn Ólafsson, formaður stjórnar Landakotsskóla. Segir enn fremur að svo miklir hafi erfiðleikarnir verið að um tíma hafi litið út fyrir að hætta þyrfti rekstrinum. Í yfirlýsingunni kemur kemur fram að við blasi að ef ekki hefði verið tekið á vandanum hefði stefnt í algert óefni með tilheyrandi óvissu fyrir á annað hundrað nemendur Landakotsskóla og fjölskyldur þeirra. Því miður hafi stjórn skólans og skólastjóri ekki verið einhuga um leiðir til lausnar og meðal annars risið ágreiningur um ábyrgð á starfsmannahaldi. Stjórn Landakotsskóla harmar að séra Hjalti Þorkelsson skólastjóri skuli hafa látið af störfum vegna þess að stjórnin hafi ekki verið reiðubúin til að fallast á kröfu hans um óskorað umboð til að ráða kennara og annað starfsfólk.