Auglýsingarnar náðu til almennings

Bannaðar auglýsingar Umferðarstofu náðu vel til almennings samkvæmt athugun IMG Gallups. Auglýsingaherferðin kallaðist „Umferðin snýst um líf“ og taldi Samkeppnisstofnun þær þess eðlis að banna bæri birtingu þeirra. Samkvæmt Gallup töldu 77 prósent að boðskapur auglýsinganna kæmist vel til skila en tæplega nítján prósent töldu hann ekki skýran. Þá töldu tæplega 35 prósent að auglýsingarnar gengju of langt en 63 prósent töldu auglýsingarnar, sem Samkeppnisstofnun taldi ósæmilegar, ganga hæfilega langt. Einar Magnús Magnússon, kynningarfulltrúi Umferðarstofu, segir niðurstöðurnar ekki koma á óvart.