Færeyskur kútter til Norðfjarðar

Færeyski kútterinn Jóhanna TG 326 er væntanlegur til Norðfjarðar á sjómannadaginn að sögn færeyska blaðsins Norðlýsið. Jóhanna TG er einn þeirra færeysku kúttera sem sigldu á stríðsárunum með fisk milli Íslands og Skotlands. Nú þegar 60 ár eru frá stríðslokum vilja Færeyingar minnast þessar þátttöku sinnar í heimsstyrjöldinni með þessum hætti. Jóhanna siglir frá Vogi í Færeyjum 2. júní og kemur til Norðfjarðar á sjómannadaginn 5. júní. Þar ætla skipverjar að kaupa tonn af fiski, en daginn eftir verður haldið til Aberdeen í Skotlandi, þar sem fiskurinn verður seldur. Tuttugu manns verða um borð í kútter Jóhönnu í ferðinni, þeirra á meðal færeyskir og íslenskir myndatökumenn. Kútterinn verður til sýnis á Norðfirði á sjómannadaginn, en skipstjóri verður Hans J. Joensen frá Vogi. Hann er barnabarn Jakke í Líð sem var einn af skipstjórunum sem stjórnuðu kútter Jóhönnu á stríðsárunum. Sérstök myndasýning verður um borð og talið að heimsóknin eigi eftir að setja nokkurn svip á sjómannadagshátíðarhöldin í Neskaupstað.