Sprengjusérfræðingur kallaður út

Maður kom í utanríkisráðuneytið í gær með böggul meðferðis og hafði í hótunum við Davíð Oddsson utanríkisráðherra. Illugi Gunnarsson ráðuneytisstjóri sagði manninn hafa litið út eins og hann gengi ekki heill til skógar og því hefði starfsfólk ráðuneytisins brugðið á það ráð að kalla á lögreglu. Þegar lögreglan kom á staðinn ákvað hún að kalla til sprengjusérfræðing til að kanna innihald böggulsins. Þegar böggullinn var opnaður kom hins vegar í ljós að hann innihélt eingöngu ýmiss konar pappírsdrasl og þvíumlíkt og var því lítil hætta á ferðum. Geir Jón Þórisson yfirlögregluþjónn sagði í samtali við blaðamann að hótunarmaðurinn væri góðkunningi lögreglunnar og hefði gert svipaðan óskunda áður. Sprengjusérfræðingurinn hafi einungis verið kallaður út til að uppfylla ítrustu varúðarkröfur. Maðurinn var fluttur í fangageymslur.