Ekki í stríð við olíufélögin

Landhelgisgæslan á að kaupa eldsneyti af Skeljungi og getur gert það í Reykjavík, á Austfjörðum og í Færeyjum. Þetta er í samræmi við rammasamning um eldsneytiskaup Landhelgisgæslunnar, Hafrannnsóknastofnunar og Flugmálastjórnar sem tók gildi 1. nóvember. Georg Kr. Lárusson, forstjóri Landhelgisgæslunnar, segir að Gæslan muni kaupa skipagasolíu í Færeyjum meðan olíuverð er jafn hátt hér og raun ber vitni. Hann kveðst þó ekki vera að fara í stríð við innlendu olíufélögin. Landhelgisgæslan getur keypt skipagasolíuna sem útflutningsvöru í Færeyjum og þarf ekki að standa skil á skatti vegna kaupanna hér á landi. Samkvæmt heimildum Fréttablaðsins hafa útgerðir stundað það lengi að kaupa olíu erlendis og sparað sér þannig virðisaukaskatt og flutningsjöfnunargjald. Landhelgisgæslan keypti alla sína olíu í Færeyjum í fyrra. Fram til 1. nóvember var olían keypt lægstbjóðanda á hverjum tíma. Hún undirbýr mál á hendur olíufélögunum vegna verðsamráðs þeirra um árabil.