Umsóknin ekki dregin til baka

Breska verslanakeðjan Iceland hefur ekki enn dregið umsókn sína til baka um einkaleyfi á orðinu Iceland í löndum Evrópusambandsins. Stjórnarformaður Iceland segir að það verði gert en lögmaður íslenskra hagsmunaaðila segist ekki hafa fengið staðfestingu á þessu hjá fyrirtækinu, þó svo að eftir því hafi verið leitað. Breska keðjan Iceland hefur um langt skeið unnið að því að fá einkaleyfi á notkun orðsins Iceland á ákveðnum sviðum viðskipta innan Evrópusambandsins. Mörgum íslenskum fyrirtækjum, hagsmunasamtökum og íslenskum stjórnvöldum hrýs hugur við þessu og telja þetta rýra möguleika íslenskra fyrirtækja til markaðssetningar afurða sinna. Frestur til að andmæla þessu rann út hjá einkaleyfastofu Evrópusambandsins þann 22. febrúar. Hins vegar brá svo við, eftir að Halldór Ásgrímsson forsætisráðherra fór þess á leit við forsvarsmenn keðjunnar að þeir drægju umsókn sína til baka, að forstjóri fyrirtækisins sendi forsætisráðherra bréf þann 15. febrúar og sagði að þeir væru fúsir til að láta af þessum áformum sínum utan Bretlands. Lovísa Jónsdóttir lögmaður, sem fer með málið fyrir hönd íslenskra fyrirtækja, segir hins vegar að engin staðfesting hafi fengist á þessum fyrirætlunum Iceland, og að Íslendingar hafi andmælt umsókn Iceland til Evrópusambandsins fyrir 22. febrúar. Hún segir að stjórn Iceland hafi enn ekki dregið umsókn sína til baka og sé væntanleg hingað til lands til fundar við stjórnvöld og fulltrúa hagsmunaaðila í næstu viku um málið. Pálmi Haraldsson, formaður stjórnar Iceland, segir að búið sé að lofa því að umsóknin verði dregin til baka og að við það verði staðið. Hvenær það gerist þorir hann ekki að segja til um og segir að þetta mál sé einfaldlega ekki efst á forgangslista nýrra stjórnenda.