Vaktirnar aflagðar vegna sparnaðar

Sparnaður og hagræðing er ástæða þess að sólarhringsvaktir á heilbrigðisstofnun Suðurnesja voru lagðar af, segir framkvæmdastjóri stofnunarinnar. Aðstoðarlandlæknir hefur sagt í fréttum að ástæðurnar séu faglegar. Sigríður Snæbjörnsdóttir, framkvæmdastjóri Heilbrigðisstofnunar Suðurnesja, ritaði Matthíasi Halldórssyni aðstoðarlandlækni bréf í kjölfar yfirlýsingar hans í fréttum Stöðvar 2 þess efnis að faglegar forsendur séu ástæða þess að sólarhringsvaktir séu ekki í boði á Suðurnesjum. Hún andmælir þar þeirri fullyrðingu og segir sparnað og hagræðingu réttu ástæðuna. „Fyrir sex eða sjö árum voru teknar ákvarðanir um að fækka hér vöktum vegna umræðna um hagræðingu og sparnað þannig að ég held að þetta sé fyrst og fremst af því sprottið,“ segir Sigríður í samtali við fréttastofuna. Sigríður segir vonlaust að meta hversu oft sólarhringsopnun skurðstofunnar hefði getað skipt sköpun, en sé þetta spuring um mínútur sé 40 mínútur langur tími. Matthías bar heilbrigðisstofnunina saman við Heilbrigðisstofnunina á Akranesi og sagði öðru máli gegna um hana. Sigríður er ekki sammála því og segist ekki sjá hvernig hægt sé að réttlæta að öryggi íbúa á Vesturlandi sé meira en íbúa á Suðurnesjum. „Ég tel að allir eigi rétt á að hafa örugga og ábyggilega þjónustu við hendina,“ segir Sigríður.