Sýknað af kröfu um laun

Hæstiréttur sýknaði í dag VSÓ ráðgjöf af rúmlega milljónar króna kröfu náttúrufræðings, vegna vinnu við matsskýrslu um umhverfisáhrif Norðlingaölduveitu. Áður hafði héraðsdómur komist að þveröfugri niðurstöðu. Í apríl dæmdi Héraðsdómur Reykjavíkur VSÓ ráðgjöf til þess að greiða Ragnhildi Sigurðardóttur náttúrufræðingi ríflega milljón króna vegna vinnu sem hún taldi sig hafa innt af hendi fyrir fyrirtækið án þess að fá fyrir það greiðslu. Vinna Ragnhildar var við matsskýrslu um umhverfisáhrif vegna Norðlingaölduveitu sem unnin var fyrir Landsvirkjun. Málið snýst þó ekki bara um fjármuni því að Ragnhildur segir að ákveðnum köflum í skýrslunni, sem ekki hafi verið Landsvirkjun hagstæðir, hafi verið breytt. Í dag sneri Hæstiréttur dómi héraðsdóms og komst að þeirri niðurstöðu að VSÓ ráðgjöf hafi ekki borið að greiða Ragnhildi fyrir ákveðna kafla skýrslunnar. Ragnhildur sagði skömmu eftir dómsuppkvaðningur að hún hefði orðið fyrir vonbrigðum. Hún hefði ekki kynnt sér dóminn fullkomlega og ekki borið hann undir lögfræðing sinn en hún fyndi fyrir vantrú yfir að málið hefði farið svona miðað við þau góðu gögn sem hún hefði haft ásamt borðleggjandi máli. Að mati Ragnhildar er niðurstaðan slæm fyrir alla náttúrufræðinga hér á landi. Hún segir að dómurinn hafi mjög mikla þýðingu fyrir þá sem vinni að matsskýrslum og verði vitni að grófum fegrunum á þeim. Ef náttúrufræðingar mótmæli því að verkkaupar breyti vinnuafurð þeirra og hægt sé að þrýsta fólki út í horn í málum án þess að dómstólar taki á því sé ekki spennandi að vera náttúrufræðingur á Íslandi í dag. Dómarar í málinu voru þrír, þeir Jón Steinar Gunnlaugsson, Ólafur Börkur Þorvaldsson og Árni Kolbeinsson