Vilja flýta landsfundi enn frekar

Tveir þingmanna Samfylkingarinnar segja að flýta eigi landsfundi flokksins enn frekar svo að langur slagur um formannsembættið skaði ekki flokkinn. Formannsefnin gefa ekki upp hvað þeim finnst um þessi áform. Atburðarrás undanfarinna daga innan Samfylkingarinnar sýnir svo ekki verður um villst að formannsslagurinn er hafin af fullum þunga. Landsfundi flokksins var fyrir skemmstu flýtt fram í maí. Nú heyrast þær raddir innan flokksins að flýta þurfi landsfundinum enn frekar eigi flokkurinn ekki að bera skaða af langri baráttu um formannsembætti. Í Íslandi í bítið í morgun sagði Mörður Árnason að framkvæmdastjórn flokksins ætti að setjast niður aftur og velta fyrir sér hvort ekki ætti að flýta landsfundinum enn þá meira, um mánuð eða einn og hálfan í viðbót. Fjórir mánuðir í kosningabaráttu innan flokksins væri ekki skynsamleg leið. Helgi Hjörvar er sama sinnis. Hann sagði í Íslandi í dag á þriðjudaginn að kosningabaráttan ætti að taka miklu styttri tíma en fjóra mánuði, með fullri virðingu fyrir Ingibjörgu og Össuri, því alls konar hættur væru á leiðinni. Kosið væri í póstkosningu þar sem væru á annan tug þúsunda kjósenda. Þekkt væru mál sem komið hefðu upp í prófkjörum víða um landið um framkvæmd kosninga og þau gætu orðið erfið og viðkvæm og þar gæti fólk hlaupið fram með alls kyns óheppilegar yfirlýsingar eins og gerst hefði í upphafi kosningabaráttunnar. Margt á þessu tímabili gæti skaðað flokkinn og því væri það skoðun hans að farsælast væri að hefja kosningu í mars og ljúka henni í þeim mánuði. Í samtali við fréttastofu Stöðvar tvö í dag sagðist Ingibjörg Sólrún ekki tilbúin til þess að svara því á þessum tímapunkti hvort sér þætti rétt að flýta landsfundinum. Rétt væri að hafa í huga að ferlið allt fram að kosningum væri tímafrekt en hins vegar væri hún alltaf opin fyrir hugmyndum. Össur Skarphéðinsson vildi ekki tjá sig um málið.