Á listann fyrir ríkisstjórnarfund

Ísland var komið á lista hinna viljugu áður en ríkisstjórnarfundur var haldinn þann 18. mars 2003. Forsætisráðherra sagði í yfirlýsingu á dögunum að ákvörðun um að styðja innrásina hefði verið tekin í kjölfar fundarins. Í yfirlýsingu sem send var frá forsætisráðuneytinu í byrjun síðustu viku var greint frá því að á ríkisstjórnarfundi sem haldinn var þann 18. mars 2003 hafi Íraksmálið verið fyrst á dagskrá og að í kjölfar þess fundar hafi Davíð Oddsson og Halldór Ásgrímsson ákveðið að styðja aðgerðir undir forystu Bandaríkjamanna og Breta um að afvopna Saddam Hussein og hafi sendiherra Bandaríkjanna á Íslandi verið tilkynnt um það. Ríkisstjórnarfundir eru að jafnaði haldnir að morgni dags, oft klukkan tíu. Sjónvarpsstöðin CNN greindi hins vegar frá því nokkrum klukkutímum fyrir fund ríkisstjórnarinnar að Ísland væri á listanum yfir lönd sem styddu innrásina. Á vefsíðu CNN má sjá tímasetningu á því hvenær fréttin er sett inn og þar kemur klárlega fram að Ísland var komið á listann margfræga að minnsta kosti fimm tímum fyrir ríkisstjórnarfundinn. Colin Powell, utanríkisráðherra Bandaríkjanna, greindi frá því á blaðamannafundi þann 17. mars að allan morguninn hefði hann rætt við vini og bandamenn Bandaríkjanna um Íraksstríðið og að hann ætti eftir að tala við fjölda annarra að blaðamannafundinum loknum. Aðfaranótt 18. mars var svo nafn Íslands komið á lista ásamt nafni 29 annarra landa. Þetta staðfesti Halldór Ásgrímsson í raun í viðtali á mánudaginn þegar hann sagði að það hefði komið sér illa að greint hefði verið frá stuðningi Íslands á CNN áður en það var tilkynnt hér. Hann sagði að vitað hefði verið að leitað hefði verið til hóps þjóða í málinu. Hins vegar hefði ekki verið vitað hvernig málið yrði kynnt. Það hefði viljað svo til að fyrstu upplýsingarnar um aðild Íslands að innrásinni í Írak hefðu komið fram á CNN og það hefðu Bandaríkjamenn gert án þess að bera það undir hérlend stjórnvöld. Það hefði komið sér stjórnvöld hefðu ætlað sér að tilkynna það sérstaklega innanlands. Sá stuðningur hefði því verið birtur án vitundar íslenskra stjórnvalda. Yfirlýsingin um að ákvörðunin hafi verið tekin í kjölfar fundarins stenst því ekki miðað við framangreindar upplýsingar. Ísland var komið á listann áður en ríkisstórnarfundur var haldinn þann 18. mars. Því hefur verið haldið fram að málflutningur ríkisstjórnarinnar í þessu máli hafi verið villandi en í þetta skiptið er hann beinlínis rangur.