Lög flokksins heimila vorþing

Vaxandi fylgi virðist vera við þá hugmynd innan Samfylkingarinnar að landsfundi flokksins verði flýtt og verði hann haldinn á vori komandi í stað hausts. "Hvort tveggja er heimilt samkvæmt lögum flokksins", segir Stefán Jón Hafstein, formaður framkvæmdastjórnar Samfylkingarinnar. Hugmynd þessa efnis var rædd á fundi framkvæmdastjórnarinnar fyrr í vikunni og málið verður tekið upp aftur á fundi 24. janúar. Össur Skarphéðinsson, formaður Samylkingarinnar segist "frekar jákvæður" á þessa hugmynd. "Ég er tilbúinn að hlýta óskum félaga minna ef þeir kjósa að halda fundinn í vor. Ég vil þó taka skýrt fram að ég er ekki upphafsmaður að þessari hugmynd. Það eru ýmsir kostir við þetta útfrá sjónarhóli flokksins og ég mun eins og alltaf hafa heill flokksins að leiðarljósi." Össur sækist eftir endurkjöri. Ingibjörg Sólrún Gísladóttir, segir að fyrri yfirlýsingar hennar um framboð standi og litlu skipti hvort kjörið verði í vor eða haust: "Ég sætti mig við hvort heldur sem er." Kostirnir við það að kjósa í vor eru fyrst og fremst þeir að stytta þann tíma sem formannsslagurinn standi. "Fjölmiðlarnir myndu fara hamförum í heila gúrkutíð ef fundurinn væri í haust" segir háttsettur flokksmaður. Einnig er bent á að flokkurinn verði í haust farinn að huga að sveitastjórnarkosningunum sem verða vorið 2006. Formaður Samfylkingarinnar verður kosinn í póstkosningu og úrslit tilkynnt á landsfundi. Þar er síðan kosið í önnur embætti, til dæmis í embætti varaformanns. Þannig er ekkert því til fyrirstöðu að tapi Ingibjörg Sólrún fyrir Össuri geti hún boðið sig fram til varaformanns að nýju.