Álagning lækkar

Á fundi bæjarstjórnar Hafnarfjarðar í gær var ákveðið að halda aukafund á mánudag til að ræða frekar lækkun álagningar fasteignaskatts. Lúðvík Geirsson bæjarstjóri segir að allir hafi verið sammála um að lækka álagningu, en fram á mánudag verði farið yfir tölur um hversu mikið eigi að lækka. Fyrir fundinn lá fyrir tillaga meirihluta bæjarstjórnar um að lækka álagningu fasteignaskatts úr 0,36 í 0,345 prósent. Jafnframt átti að lækka grunninn á atvinnuhúsnæði úr 1,65 í 1,628 prósent. Lúðvík segir lækkunina koma til vegna hækkunar á fasteignamati auk íbúafjölgunar í bænum. Hann segir jafnframt að í fjárhagsáætlun hafi verið reiknað með um 13 prósenta hækkun á tekjum bæjarsjóðs á árinu vegna fasteignaskatts. Að óbreyttu hefðu tekjurnar aukist um 18 prósent með breyttum fasteignagrunni. Hefði lækkunin verið samþykkt hefðu tekjur bæjarsjóðs vegna fasteignaskatts aukist um 15 prósent.