Átta hundruð á hvern Íslending

Miðað við höfðatölu hefur hver Íslendingur gefið átta hundruð og tuttugu krónur til að lina þjáningar bágstaddra eftir hamfarirnar á annan jí jólum við Indlandshaf. Heildarupphæð íslenskra framlaga er komin í 240 milljónir króna. Munar þar mestu um framlag ríkisstjórnarinnar, alls 150 milljónir sem samþykkt var á föstudag. Rauði kross Íslands hefur safnað um áttatíu milljónum króna hjá almenningi og fyrirtækjum. Ríkisstjórnin samþykkti á fundi sínum á föstudag að bæta sex milljónum við þær fimm milljónir sem þegar höfðu verið af hendi raktar í þá söfnun og Reykjavíkurborg lagði til tíu milljónir. Hjálparstarf kirkjunnar hefur safnað hálfri fimmtu milljón, SOS barnahjálp einni milljón og Barnavernd hálfri tveimur milljónum. Samtals eru því framlög hjálparstofnana og ríkissjóðs á Íslandi 240 milljónir króna. Ef litið er til Norðurlanda hafa Íslendingar látið minna af hendi rakna en Norðurlandaþjóðirnar að Svíum undanskildum. Norðmenn eru gjafmildastir með rúmlega 2.500 krónur á mann og eru næstrausnarlegasta þjóð heims á eftir Áströlum. Framlög okkar eru heldur lægri miðað við höfðatölu en Íslendingar hafa látið af hendi rakna minna fé en Danir og Finnar, um það bil 1.000 krónur á mann, en talsvert meira en Svíar með 500 krónur á mann. Athygli vekur að auðugasta ríki heims, Bandaríkin, er næstneðst á lista með aðeins 72 krónur á mann. Aðeins Frakkar láta minna af hendi rakna miðað við höfðatölu eða 57 krónur. Reyndar versnar enn samanburðurinn ef tillit er tekið til þess að Evrópusambandið greiðir rúma 38 milljarða króna til neyðaraðstoðar og uppbyggingar á hamfarasvæðunum. Vonir standa til að framlög Íslands eigi eftir að hækka umtalsvert. Elín Þ. Þorsteinsdóttir, verkefnisstjóri söfnunarinnar "Neyðarhjálp úr norðri", segir að ekki sé stefnt að því að ná neinni ákveðinni fjárhæð inn í söfnuninni en vonir standi til að góður árangur náist enda ætli öll hjálparsamtök að leggjast á eitt. Söfnunin nær hámarki með beinum útsendingum allra sjónvarpsstöðva laugardagskvöldið 15. janúar.