Genginn til liðs við Sharon

Shaul Mofaz, varnarmálaráðherra Ísraels, hefur sagt skilið við Likud-flokkinn og gengið til liðs við miðflokk Ariels Sharon forsætisráðherra. Mofaz segir að hægri öfgamenn hafi rænt Likud-flokknum og því hefði hann ekki getað unað. Mofaz var einn öflugasti leiðtogi Likud-flokksins.

Ákvörðun hans um að breyta til kemur nokkrum vikum eftir að skoðanakannanir sýndu að hann væri langt á eftir Benjamin Netanyahyu, fyrrverandi forsætisráðherra, og Silvian Shalom utanríkisráðherra í baráttunni um að verða næsta forsætisráðherraefni Likud-flokksins.