Álversframkvæmdir ekki stöðvaðar

Samkvæmt dómi Hæstaréttar síðast liðinn fimmtudag, í máli sem Hjörleifur Guttormsson höfðaði gegn íslenska ríkinu, Alcoa á Íslandi, Fjarðaáli og Reyðaráli, þarf að fara fram nýtt mat á umhverfisáhrifum álverksmiðjunnar sem í byggingu er í Reyðarfirði. Hjörleifur segir að umhverfismat sé forsenda og frumskilyrði fyrir veitingu framkvæmda- og starfsleyfis og því beri stjórnvöldum að afturkalla þau leyfi sem veitt hafa verið. "Stjórnvöld eiga að tryggja að beðið verði með frekari framkvæmdir á meðan Alcoa vinnur að nýju mati á umhverfisáhrifum og það mat fær meðferð lögum samkvæmt," segir Hjörleifur. Ásdís Hlökk Theodórsdóttir aðstoðarskipulagsstjóri hjá Skipulagsstofnun segir að framkvæmdaleyfi og starfsleyfi falli ekki sjálfkrafa úr gildi með dómnum heldur sé það í höndum leyfisveitenda, Umhverfisstofnunar vegna starfsleyfis og Fjarðabyggðar vegna framkvæmdaleyfis, að afturkalla leyfin ef þessir aðilar telja forsendur fyrir leyfunum brostnar. Þótt starfsleyfi hafi verið gefið út er ekki aðkallandi að endurskoða það þar sem leyfið kemur í raun ekki til framkvæmda fyrr en verksmiðjan verður tilbúin árið 2007. Lögmaður Umhverfisstofnunar, Sigurður Örn Guðleifsson, segir að í kjölfar dóms Hæstaréttar hafi stofnunin skoðað hvort hugsanlega ætti að afturkalla starfsleyfið en ákveðið að gera það ekki. "Okkar niðurstaða er að bíða eftir nýju umhverfismati og skoða þá málið að nýju," segir Sigurður Örn. Í lögum um mat á umhverfisáhrifum segir að óheimilt sé að gefa út leyfi fyrir matsskyldri framkvæmd og starfsemi sem henni fylgi fyrr en úrskurður um mat á umhverfsiáhrifum liggur fyrir. Guðmundur Bjarnason, bæjarstjóri Fjarðabyggðar, segir að bæjaryfirvöld muni ekki afturkalla framkvæmdaleyfi enda komi ekkert fram í dómi Hæstaréttar sem kalli á slíkt. "Það eina sem við þurfum að skoða vandlega eru þau byggingaleyfi sem Alcoa sækir um á meðan á þessu umhverfsmati stendur og gæta þess að þau brjóti ekki í bága við lög og reglugerðir. Verði hins vegar mikil breyting á nýju umhverfismati frá hinu fyrra þá þarf að fara yfir allar leyfisveitingar á nýjan leik," segir Guðmundur.