Víkja sæti úr stjórn skóla

Gunnar Örn Ólafsson, formaður stjórnar Landakotsskóla sjálfseignarfélags, og Jóhanna Long, ritari stjórnar, hafa ákveðið að víkja sæti úr stjórn félagsins í því skyni að sátt megi skapast um framtíð skólahalds að Landakoti. Í yfirlýsingu sem stjórn skólans sendi frá sér fyrir stundu segir að nýr stjórnarformaður, Björg Thorarensen, prófessor og foreldri, og Þórunn Erhardsdóttir, formaður foreldraráðs, hafi tekið sæti þeirra í stjórninni. Fyrr í dag barst yfirlýsing frá séra Hjalta Þorkelssyni, fyrrverandi skólastjóra Landakotsskóla, þar sem hann segist ekki eiga hlut að stofnun nýs grunnskóla sem óánægðir kennarar við Landakotsskóla íhuga að setja á laggirnar í samvinnu við foreldra skólabarna.