Fimm milljarðar á fimmtán árum

Heildarkostnaður samfélagsins vegna tjóna á Suðurlandsvegi milli Reykjavíkur og Selfoss á árunum 1990-2005 er um fimm milljarðar króna. Þetta kom fram á blaðamannafundi sem Vinir Hellisheiðar héldu á Hótel Selfossi í gær. Meðalkostnaður vegna umferðarslysa á Suðurlandsvegi er rúmlega 5,6 milljónir en kostnaður á sambærilegum vegum annars staðar á landinu er ein og hálf milljón.  "Árekstrar á Suðurlandsvegi eru alvarlegri en gengur og gerist á landinu. Umferðin er svo þétt þarna og því er ekki skrítið að aftanákeyrslur séu svo tíðar. Ég held að ef vegurinn yrði tvöfaldaður þá myndi árekstrum fækka. Það er því þörf á að fjölga akreinum milli Reykjavíkur og Selfoss," segir Einar Guðmundsson, forvarnarfulltrúi hjá Sjóvá, sem kynnti tölurnar á fundinum. "Við viljum koma þessum staðreyndum á framfæri svo hægt verði að byggja á þeim í umræðunni um veginn milli Reykjavíkur og Selfoss. Við viljum fá fjögurra akreina upplýstan veg því þannig teljum við að sem mest umferðaröryggi náist. Á þessum tölum er hægt að byggja ákvarðanir um slíka framkvæmd," segir Sigurður Jónsson hjá Vinum Hellisheiðar.